ឯកឧត្តម ជា ជេដ្ឋ អញ្ជើញចូលរួមកិច្ចប្រជុំសើរើលក្ខន្តិកៈនៃសភាប្រើភាសាបារាំង
នាយប់ថ្ងៃទី១៤ ខែធ្នូ ឆ្នាំ២០២១ វេលាម៉ោង ២១:៣០នាទី ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា និងជាសមាជិកក្រុមការងារទទួលបន្ទុកការសើរើលក្ខន្តិកៈនៃសភាប្រើភាសាបារាំង បានអញ្ជើញចូលរួមកិច្ចប្រជុំក្រុមការងារដើម្បីពិនិត្យ និងពិភាក្សាសេចក្តីព្រាងស្តីពី ការសើរើលក្ខន្តិកៈនៃសភាប្រើភាសាបារាំង (APF) ក្រោមអធិបតីភាពឯកឧត្តម Christophe Andre Frassa ប្រធានក្រុមការងារទទួលបន្ទុកសើរើលក្ខន្តិកៈសភាប្រើភាសាបារាំង និងជាប្រធានគណៈកម្មការនយោបាយសភាប្រើភាសាបារាំង តាមប្រព័ន្ធនិម្មិត (ZOOM) ដែលផ្សាយចេញពីទីក្រុងប៉ារីស ប្រទេសបារាំង។
នៅក្នុងឱកាសនោះ ឯកឧត្តម ជា ជេដ្ឋ បានថ្លែងចំណាប់អារម្មណ៍លើការសង្កេតនៃសេចក្តីព្រាងនេះ (មាត្រា ១-៣ ស្តីពី អាសយដ្ឋាន និងមាត្រា ៥-១ និងមាត្រា ៦-៧ ស្តីពី បទបញ្ជាផ្ទៃក្នុង) ហើយអង្គប្រជុំបានទទួលយកដើម្បីពិភាក្សានៅខែមេសា ឆ្នាំ ២០២២។
កិច្ចប្រជុំនេះ រៀបចំឡើងក្នុងគោលបំណងធ្វើបទបង្ហាញសេចក្តីព្រាងសើរើលក្ខន្តិកៈជូនកិច្ចប្រជុំគណៈកម្មាធិការអចិន្ត្រៃយ៍ APF ដែលនឹងប្រព្រឹត្តទៅនាថ្ងៃទី២៧ និងថ្ងៃទី២៨ ខែមករា ឆ្នាំ២០២២ នាពេលខាងមុខ នៅទីក្រុង Libreville ដើម្បីស្នើសុំមហាសន្និបាតសភាប្រើភាសាបារាំង ដែលនឹងប្រព្រឹត្តទៅនៅ Montreal ប្រទេស Canada ផ្តល់សច្ចារប័នយល់ព្រមលើការសើរើលក្ខន្តិកៈរបស់ APF ៕
